Viju de frunte a mmie pped’ogne bbanna
Muntagne e ppue muntagne
Ammantate de cerze e dde castagne
Càrriche de giurranna.

Dduve cc’è ‘ncunu chjanu
‘A terra unnija, simminata a ggranu
E, tra tuttu ‘ssu virde, a ddestra e a mmanca,
Ammucciata, se vide
‘Ncuna casella janca
Chi spija ‘ntuornu e ppàrica surride.

‘Na trempa pinninuta
Luntana e scavunata,
E’ ttutta scacchiata
De jinostra juruta.

L‘urtimi munti, chilli
Cchiù bbicini a ri stilli,
Su’ ttutti quanti chjni
De carigli e dde pini.

‘U cielu è ttuttu luce
E ll’ecu, ccu ‘nna vuce
Appassiunata e dduce
Ripete ssempre e ssempre
Ppe’ ttutte chire trempe
Gridi de quatrarielli
E bbiscuni d’aggielli.